Mwanamuziki kutoka Tanzania Faustina Charles Mfinanga almaarufu Nandy amezindua lebo yake kwa jina ‘The African Princess.’
Lebo hiyo ambayo ilizinduliwa Jumatatu, Januari 16, 2023, itakuwa ya wanawake pekee.
Akielezea kwenye mitandao ya kijamii, Nandy alisema aliona tasnia ya muziki ina wasanii wachache wa kike na ndoto yake ni kusaidia wasanii chipukizi na kukuza vipaji vyao.
“Ninayo furaha kubwa kuileta kwenu Rasmi THE AFRICAN PRINCESS LABEL…! 2023 lebel ambayo itahusisha wanawake tu! Kama tunavo ona industry ya watoto wa kike ni chache sana na uthubutu umekuwa ni mdogo so tunaimani na kuomba the African princess label itaongeza wingi wa vipaji vya watoto. wa kike waliopo mtaaani wenye ndoto kubwa ya kuwa wanamziki!!.”
Alionyesha furaha yake baada ya kufikia hatua hiyo muhimu na kuanza mwaka kwa kiwango cha juu.
Nandy alisema ana matumaini kuwa vyombo vya habari vitampa support anayohitaji ili kutimiza ndoto yake, na kuongeza kuwa lebo hiyo itasajili wasanii kutoka pande zote za Afrika na si Tanzania pekee.
“Ni matumaini yangu makubwa kwa MEDIA, BLOGS, MASHABIKI mtatupokea kwa moyo mmoja na kutupa msaada wa Hali na Mali Ili tuweze kutimiza ndoto za mabinti walio mtaani… Lakini pia hii label sio ya Tanzania tu! Ni label ya AFRICA. So tutarajie kuona vipaji mbali mbali kutoka nchi mbali mbali. Ndo mana inaitwa AFRICAN PRINCESS LABEL.“
Aliwashukuru mashabiki wake kwa kuendelea kumuunga mkono akifichua kwamba atamtambulisha msanii wa kwanza aliyesainiwa katika lebo yake Alhamisi ijayo tarehe 19 Januari.
“Shukrani za dhati kwa watu wote walio pokea hili huu ni mwanzo kaa karibu na taifa lako maaana soon tutamzindua msanii wetu wa kwanza.“
Mwimbaji huyo sasa amejiunga na orodha ya wanamuziki wa Tanzania kama vile Diamond Platnumz, Ali Kiba, Harmonize, Rayvanny kati ya wengine wanaomiliki lebo zao za kurekodi.
BY EDWIN KIPROTICH